கெய்ன்ஸ்:
தென் ஆப்பிரிக்க கிரிக்கெட் அணி ஆஸ்திரேலியாவில் சுற்றுப்பயணம் செய்து விளையாடி வருகிறது.
இரு அணிகள் இடையிலான 3 ஆட்டங்கள் கொண்ட டி 20 கிரிக்கெட் தொடரில் டார்வினில் நடைபெற்ற முதல் ஆட்டத்தில் ஆஸ்திரேலிய அணி 17 ரன்கள் வித்தியாசத்தில் வெற்றி பெற்றது.
இதைத் தொடர்ந்து நடைபெற்ற 2-வது ஆட்டத்தில் தென் ஆப்பிரிக்க அணி 53 ரன்கள் வித்தியாசத்தில் வெற்றி பெற்று பதிலடி கொடுத்தது.
இளம் அதிரடி பேட்ஸ்மேனான டெவால்ட் பிரேவிஸ் 56 பந்துகளில், 125 ரன்கள் விளாசி அசத்தியிருந்தார். டி 20 தொடர் 1-1 என சமநிலையில் இருக்கும் நிலையில் இரு அணிகளும் இன்று (16-ம் தேதி) கடைசி மற்றும் 3-வது ஆட்டத்தில் மோதுகின்றன. இந்த ஆட்டம் இந்திய நேரப்படி பிற்பகல் 2.45 மணிக்கு கெய்ன்ஸ் நகரில் உள்ள கசாலிஸ் மைதானத்தில் நடைபெறுகிறது.
கர்நாடக கிரிக்கெட் சங்க தேர்தலில் போட்டியிடுகிறார் வெங்கடேஷ் பிரசாத்: கர்நாடக மாநில கிரிக்கெட் சங்க தேர்தலில் முன்னாள் இந்திய வேகப்பந்து வீச்சாளர் வெங்கடேஷ் பிரசாத் போட்டியிட உள்ளார். கர்நாடக கிரிக்கெட் சங்க நிர்வாகிகளின் பதவிக்காலம் வரும் செப்டம்பர் 30-ம் தேதியுடன் முடிவடைகிறது.
இதனால் அக்டோபர், நவம்பர் மாத இடைவேளையில் புதிய நிர்வாகிகளுக்கான தேர்தல் நடைபெறும் என கருதப்படுகிறது.
இந்நிலையில் முன்னாள் இந்திய வேகப்பந்து வீச்சாளர் வெங்கடேஷ் பிரசாத் தலைமையில் ஒரு குழுவினர் கர்நாடக மாநில கிரிக்கெட் சங்க தேர்தலில் போட்டியிட உள்ளனர். 56 வயதான வெங்கடேஷ் பிரசாத் பயிற்சியாளர், தேர்வாளர் மற்றும் நிர்வாக பொறுப்புகளில் பணியாற்றி உள்ளார்.
அனில் கும்ப்ளே 2013 முதல் 2016 வரை கர்நாடக கிரிக்கெட் சங்க தலைவராக இருந்த போது வெங்கடேஷ் பிரசாத் துணைத் தலைவராகப் பணியாற்றியிருந்தார்.
ஆனால், அதன் பின்னர் வெங்கடேஷ் பிரசாத் நிர்வாக பணிகளில் இருந்து விலகி பயிற்சியாளர், நிபுணர் மற்றும் வர்ணனையாளராக பணியாற்றினார். ஐபிஎல் தொடரில் பஞ்சாப் கிங்ஸ் அணியின் பயிற்சியாளராக பணியாற்றி இருந்தார்.
2,000 மீட்டர் ஸ்டீபிள்சேஸில் அங்கிதா சாதனை: இஸ்ரேலில் கிராண்ட்ஸ்லாம் ஜெருசலேம் தடகளப் போட்டி நடைபெற்று வருகிறது. இதில் மகளிருக்கான 2 ஆயிரம் மீட்டர் ஸ்டீபிள்சேஸில் இந்தியாவின் அங்கிதா தியானி பந்தய தூரத்தை 6:13.92 விநாடிகளில் கடந்து முதலிடம் பிடித்து சாம்பியன் பட்டம் வென்றார். இதற்கு முன்னர் பாருல் சவுத்ரி பந்தய தூரத்தை 6:14.38 விநாடிகளில் கடந்ததே தேசிய சாதனையாக இருந்தது.
இதை தற்போது 23 வயதான ஒலிம்பியனான அங்கிதா தியானி முறியடித்துள்ளார். இஸ்ரேலின் அட்வா கோஹன் 6:15.20 விநாடிகளிலும், டென்மார்க்கின் ஜூலியான் ஹ்விட் 6:17.80 விநாடிகளிலும் இலக்கை அணி முறையே 2 மற்றும் 3-வது இடத்தை பிடித்தனர்.
தற்போதைய வெற்றியின் மூலம் கிடைத்துள்ள தரவரிசை புள்ளிகளுடன், அடுத்த மாதம் டோக்கியோவில் நடைபெற உள்ள உலக சாம்பியன்ஷிப் தொடரில் இடம் பெறும் 3000 மீட்டர் ஸ்டீபிள்சேஸுக்கு தகுதி பெறுவதற்கான வாய்ப்புகளை அங்கிதா அதிகரித்துக் கொண்டுள்ளார்.
