ஜோகன்னஸ்பர்க்:
ஐ.நா. சபையில் சீர்திருத்தங்களை மேற்கொள்ள வேண்டியது காலத்தின் கட்டாயம். இதை தட்டிக் கழிக்கவே முடியாது என்று பிரதமர் மோடி தெரிவித்துள்ளார்.
தென்னாப்பிரிக்காவின் ஜோகன்னஸ்பர்க் நகரில் ஜி20 அமைப்பின் 2 நாள் உச்சி மாநாடு நேற்று முன்தினம் தொடங்கியது. முதல் நாள் உச்சி மாநாட்டில் பிரதமர் மோடி பல முக்கிய யோசனைகளை முன்வைத்தார்.
இரண்டாம் நாள் மாநாட்டின் ஒரு பகுதியாக தென்னாப்பிரிக்க அதிபர் சிரில் ராமபோசாவுடன் பிரதமர் நரேந்திர மோடி முக்கிய பேச்சுவார்த்தை நடத்தினார்.
அப்போது வர்த்தகம், முதலீடு, சுரங்கம், அரியவகை தனிமங்கள், செயற்கை நுண்ணறிவு, உணவு பாதுகாப்பு உள்ளிட்ட துறைகளில் இரு நாடுகளும் இணைந்து பணியாற்ற உறுதி மேற்கொள்ளப்பட்டது.
ஐபிஎஸ்ஏ கூட்டமைப்பு: இந்தியா, பிரேசில், தென்னாப்பிரிக்கா ஆகியவை இணைந்து கடந்த 2003-ம் ஆண்டில் ஐபிஎஸ்ஏ என்ற கூட்டமைப்பை உருவாக்கின. ஜி20 உச்சி மாநாட்டின் ஒரு பகுதியாக ஐபிஎஸ்ஏ கூட்டமைப்பின் மாநாடு ஜோகன்னஸ்பர்க் நகரில் நேற்று நடைபெற்றது.
இதில் பிரதமர் மோடி, பிரேசில் அதிபர் லூயிஸ் இனாசியோ லூலா டா சில்வா, தென்னாப்பிரிக்க அதிபர் சிரில் ராமபோசா ஆகியோர் பங்கேற்றனர்.
மாநாட்டில் பிரதமர் மோடி பேசியதாவது: ஐபிஎஸ்ஏ என்பது 3 நாடுகளின் கூட்டமைப்பு கிடையாது. இது 3 கண்டங்கள், 3 ஜனநாயக நாடுகள், 3 மிகப்பெரிய பொருளாதாரங்களின் கூட்டமைப்பு ஆகும்.
இதன் மூலம் சர்வதேச அரங்கில் தெற்கு நாடுகளின் குரல் ஓங்கி ஒலித்து வருகிறது. ஐ.நா. பாதுகாப்பு கவுன்சிலில் 3 நாடுகளுமே இடம் பெறவில்லை. இதன்மூலம் இன்றைய உலக சூழலை ஐ.நா. சபை பிரதிபலிக்கவில்லை என்பது தெள்ளத்தெளிவாகிறது.
இந்த நேரத்தில் ஐபிஎஸ்ஏ சார்பில் ஒட்டுமொத்த உலகத்துக்கும் மிக முக்கிய கருத்தை எடுத்துரைக்க விரும்புகிறேன்.
ஐ.நா. சபையில் சீர்திருத்தங்களை மேற்கொள்வது காலத்தின் கட்டாயம் ஆகும். இதை தட்டிக் கழிக்கவே முடியாது.
உலகின் அமைதி, வளத்துக்கு தீவிரவாதம் மிகப்பெரிய சவாலாக உருவெடுத்து வருகிறது. தீவிரவாதத்தை வேரறுக்க ஐபிஎஸ்ஏ கூட்டமைப்பு ஒன்றிணைந்து செயல்படும்.
எங்கள் கூட்டமைப்பு சார்பில் டிஜிட்டல் புதுமை கண்டுபிடிப்பு கூட்டமைப்பு உருவாக்கப்படும்.
எங்கள் கூட்டமைப்பு சார்பில் இந்தியாவில் அடுத்த ஆண்டு செயற்கை நுண்ணறிவு உச்சி மாநாடு நடைபெறும். ஐபிஎஸ்ஏ நிதியம் வெற்றிகரமாக செயல்பட்டு வருகிறது.
இந்த நிதியத்தின் மூலம் சுமார் 40 நாடுகளில் 50-க்கும் மேற்பட்ட திட்டங்கள் நிறைவேற்றப்பட்டு உள்ளன.
குறிப்பாக தெற்கு நாடுகளில் சுகாதாரம், பெண்கள் மேம்பாடு, சூரிய மின் உற்பத்தி திட்டங்கள் செயல்படுத்தப்பட்டு உள்ளன. ஒட்டுமொத்த உலகத்துக்கும் முன்மாதிரியாக ஐபிஎஸ்ஏ செயல்படும். இவ்வாறு பிரதமர் மோடி பேசினார்.
