தற்போது தமிழ்நாடு அடைந்துள்ள வளர்ச்சியை இன்னும் அதிகப்படுத்த ஒவ்வொரு மாவட்டத்துக்கும் பார்த்து பார்த்து திட்டங்களை செயல்படுத்தி வருகிறோம் – கோவையில் முதல்வர் மு.க.ஸ்டாலின் பேச்சு !!

கோவை:
தமிழ்நாடு அரசின் தொழில்துறை சார்பில், தூத்துக்குடி, ஓசூர் ஆகிய இடங்களில் ‘தமிழ்நாடு ரைசிங்’ தொழில் முதலீட்டாளர்கள் மாநாடு நடத்தப்பட்டது.

அதன் தொடர்ச்சியாக மேற்கு மண்டல மாவட்டங்களை உள்ளடக்கிய கோவையில் ‘டிஎன் ரைசிங்’ தொழில் முதலீட்டாளர் மாநாடு நேற்று மாலை நடைபெற்றது. மாநாட்டுக்கு முதல்வர் ஸ்டாலின் தலைமை வகித்தார்.

தொழில்துறை அமைச்சர் டி.ஆர்.பி.ராஜா வரவேற்றார். அதைத்தொடர்ந்து முதல்வர் ஸ்டாலின் முன்னிலையில் தொழில் முதலீட்டாளர்கள், அரசிடம் புரிந்துணர்வு ஒப்பந்தங்கள் செய்து கொண்டனர்.

இந்த மாநாட்டில் முதல்வர் ஸ்டாலின் பேசியதாவது:

இங்கு வந்துள்ள முதலீட்டாளர்களாகிய நீங்கள், கடந்த நான்காண்டுகளில் கடுமையான உழைப்பை செலுத்தி, ஏராளமான முதலீட்டாளர்கள், தொழில் நிறுவனங்களின் நம்பிக்கையை பெற்று, இந்தியாவிலேயே அதிகமாக 11.1 விழுக்காடு பொருளாதார வளர்ச்சியை சாத்தியப்படுத்தி உள்ள தமிழ்நாட்டுக்கு வந்துள்ளீர்கள்.

இதுவரை நடத்திய 17 முதலீட்டாளர்கள் மாநாட்டின் விளைவாக 1,016 புரிந்துணர்வு ஒப்பந்தங்கள் மேற்கொள்ளப்பட்டுள்ளன. இது கடந்த ஆட்சிக்காலத்தில் கடைசி 4 ஆண்டுகளை விட இரண்டரை மடங்கு அதிகம்.

இந்த புரிந்துணர்வு மூலமாக 11 லட்சத்து 40,731 கோடி ரூபாய் முதலீடு உறுதி செய்யப்பட்டு, நேரடியாகவும், மறைமுகமாகவும் 34 லட்சம் பேருக்கு வேலைவாய்ப்பு உறுதி செய்யப்பட்டுள்ளது.

நம் திராவிட மாடல் அரசு போட்டுள்ள 1,016 புரிந்துணர்வு ஒப்பந்தங்களில் 809 திட்டங்கள் பல்வேறு நிலைகளில் செயல்பாட்டில் உள்ளன.

புதிய ஐடியாக்களோடு இளைஞர்கள் தொழில் தொடங்க முன்வந்தால் திராவிட மாடல் அரசு அவர்களுக்கு ஆதரவு அளிக்கிறது. கடந்த மாதம் கூட இதே கோவைக்கு வந்து உலக புத்தொழில் மாநாடு தொடங்கி வைத்தோம்.

சின்ன சின்ன நகரங்களுக்கு கூட சென்று ஸ்டார்ட் அப் தமிழ்நாடு மூலமாக இளைஞர்களை தொழில் தொடங்க ஊக்குவிக்கிறோம். அதனால் தற்போது தமிழ்நாட்டில் உள்ள ஸ்டார்ட் அப் நிறுவனங்களின் எண்ணிக்கை 12,663 ஆக உயர்ந்துள்ளது.

நாங்கள் ஆட்சிக்கு வருவதற்கு முன்பு 62,413 நிறுவனங்கள் இருந்த தமிழ்நாட்டில் தற்போது 79,185 நிறுவனங்கள் உள்ளன.

நாங்கள் ஆட்சிக்கு வந்த பிறகு 29 லட்சத்து 64 ஆயிரம் பணியாளர்கள் அதிகரித்துள்ளதாக புள்ளி விவரங்களை வெளியிட்டுள்ளனர்.

இதைவிட தொழில் வளர்ச்சியில் தமிழ்நாடு வளர்ச்சி அடைந்துள்ளது என்பதற்கு புள்ளிவிவரம் தேவையா?.

தொழில் முதலீடுகளை கொண்டு வருவது சாதாரண விஷயம் கிடையாது. என்ன மாதிரியான முதலீடு, எவ்வளவு பேருக்கு வேலைவாய்ப்பு என்பதில் நாங்கள் கவனம் செலுத்துகிறோம்.

முதலீட்டாளர்கள் கேட்கும் சலுகைகளையும், அந்த முதலீடுகள் மூலம் தமிழ்நாட்டுக்கு கிடைக்கும் பலன்களையும் ஒப்பிட்டுதான் சரியான முடிவு எடுக்கிறோம்.

அதனால் தான் தற்போது தமிழ்நாடு அடைந்துள்ள வளர்ச்சியை இன்னும் அதிகப்படுத்த ஒவ்வொரு மாவட்டத்துக்கும் பார்த்து பார்த்து திட்டங்களை செயல்படுத்தி வருகிறோம்.

அப்படி தூத்துக்குடி, ஓசூரை தொடர்ந்து இன்று கோவையில் ‘தமிழ்நாடு ரைசிங்’ மாநாட்டை நடத்தி வருகிறோம்.

தமிழ்நாட்டில் முதலீடு செய்ய வந்துள்ளவர்களுக்கு எந்தவித தாமதமும் ஏற்படாது. எந்த தலையீடும் இருக்காது.

இங்கு எல்லாமே வேகமாகவும், தெளிவாகவும், வெளிப்படைத்தன்மையுடனும் இருக்கும்.

ஒரு ட்ரில்லியன் டாலர் பொருளாதாரத்தை நோக்கி திராவிட மாடல் அரசு வேகமாக செல்கிறது.

இன்று 158 புரிந்துணர்வு ஒப்பந்தங்கள் உள்ளிட்ட 170 திட்டங்கள் 43,844 கோடி ரூபாய் மதிப்பிலான முதலீடுகள் மூலமாக ஒரு லட்சத்து 709 பேருக்கு வேலைவாய்ப்பு அளிக்க உள்ளன. உங்களை வரவேற்கிறேன். இவ்வாறு முதல்வர் ஸ்டாலின் பேசினார்.