புதுடெல்லி:
மகளிர் பிரீமியர் லீக் கிரிக்கெட் தொடர் வருகிற ஜனவரி 9-ம் தேதி முதல் பிப்ரவரி 5 வரை நடைபெறும் என அறிவிக்கப்பட்டுள்ளது.
மகளிர் பிரீமியர் லீக் கிரிக்கெட் தொடர் வழக்கமாக பிப்ரவரி – மார்ச் மாதங்களில் நடைபெறும்.
ஆனால், ஐசிசி ஆடவர் டி20 கிரிக்கெட் உலகக் கோப்பைத் தொடர் பிப்ரவரி 7-ம் தேதி தொடங்க உள்ளதால், மகளிர் பிரீமியர் லீக் கிரிக்கெட் தொடர் இந்த முறை முன்கூட்டியே நடத்தப்படுகிறது.
மகளிர் பிரிமீயர் லீக் 3 சீசன்களைக் கடந்துள்ள நிலையில், அடுத்த ஆண்டு நடைபெறும் 4-வது சீசன் 2026-ம் ஆண்டு ஜனவரி 9-ம் தேதி தொடங்கி பிப்ரவரி 5-ம் தேதி வரை நடைபெறுகிறது. போட்டிகள் நவி மும்பை மற்றும் வதோதராவில் நடத்தப்படவுள்ளன.
இது தொடர்பாக மகளிர் பிரீமியர் லீக் தலைவர் ஜெயேஷ் ஜியார்ஜ் கூறும்போது, “மகளிர் பிரீமியர் லீக் தொடரின் அடுத்த சீசன் நவி மும்பை மற்றும் வதோதராவில் நடத்தப்படும்.
தொடரின் பாதிப் போட்டிகள் டி.ஒய்.பாட்டீல் மைதானத்தில் நடத்தப்படும். அதன் பின்னர் மீதமுள்ள போட்டிகள் வதோதராவில் நடத்தப்படும். இறுதிப் போட்டியும் வதோதராவில் நடைபெறும்” என்றார்.
