ஹாங்காங்:
ஹாங்காங் அடுக்குமாடி குடியிருப்புகளில் ஏற்பட்ட தீ விபத்தில் இதுவரை 75 பேர் உயிரிழந்துள்ளனர். 70-க்கும் மேற்பட்டோர் பலத்த தீக்காயமடைந்து உள்ளனர். 279 பேரை காணவில்லை.
ஹாங்காங்கின் டய் போ பகுதியில் வாங் பக் கோர்ட் என்ற அடுக்குமாடி குடியிருப்பு வளாகம் உள்ளது. இதில் 8 அடுக்குமாடி குடியிருப்புகள் உள்ளன. ஒவ்வொரு அடுக்குமாடி குடியிருப்பும் 31 மாடிகளை கொண்டதாகும்.
ஒட்டுமொத்தமாக 2,000-க்கும் மேற்பட்ட வீடுகள் உள்ளன. இந்த வீடுகளில் சுமார் 5,000 பேர் வசித்து வந்தனர். கடந்த சில மாதங்களாக வாங் பக் கோர்ட் அடுக்குமாடி குடியிருப்பில் பராமரிப்பு பணிகள் நடைபெற்று வந்தன.
இதற்காக சாரம் அமைக்க மூங்கில் கட்டைகளும் தூசி பறக்காமல் இருக்க தார்பாலின் துணிகளும் பெருமளவில் பயன்படுத்தப்பட்டன.
இந்த சூழலில் கடந்த புதன்கிழமை பிற்பகலில் வாங் பக் கோர்ட் வளாகத்தில் தீ விபத்து ஏற்பட்டது. மூங்கில் சாரம், தார்பாலின் காரணமாக 8 அடுக்குமாடி குடியிருப்புகளுக்கும் தீ மளமளவென்று பரவியது.
பராமரிப்பு பணி காரணமாக பெரும்பாலான வீடுகளின் ஜன்னல்கள் அடைத்து வைக்கப்பட்டிருந்ததன. இதன்காரணமாக தீ விபத்து ஏற்பட்டதை பொதுமக்களால் உடனடியாக அறிந்து கொள்ள முடியவில்லை.
ஒரே நேரத்தில் 8 அடுக்குமாடி குடியிருப்புகளிலும் வானளாவிய உயரத்துக்கு தீப்பற்றி எரிந்தது.
சுமார் 20 மணி நேர போராட்டத்துக்குப் பிறகு தீ அணைக்கப்பட்டது. ஆயிரத்துக்கும் மேற்பட்ட போலீஸார் பாதுகாப்பு மற்றும் மீட்புப் பணிகளில் ஈடுபட்டனர். தீ விபத்து நேரிட்ட பகுதியை ஹாங்காங் தலைமை செயல் அதிகாரி ஜான் லீ நேற்று பார்வையிட்டார்.
அவர் கூறியதாவது: வாங் பக் கோர்ட் வளாகத்தில் ஏற்பட்ட தீ விபத்தில் 75 பேர் உடல் கருகி உயிரிழந்தனர். முதல்கட்ட கணக்கெடுப்பின்படி 279 பேரை காணவில்லை. அவர்களை தேடும் பணி தீவிரப்படுத்தப்பட்டு உள்ளது. இவ்வாறு அவர் தெரிவித்தார்.
முதல்கட்ட விசாரணையில் சிகரெட்டை அணைக்காமல் வீசியதால் தீ விபத்து ஏற்பட்டிருப்பதாக தெரிகிறது.
அடுக்குமாடி குடியிருப்பில் பராமரிப்புப் பணியை மேற்கொண்ட நிறுவனத்தின் 3 மூத்த அதிகாரிகள் கைது செய்யப்பட்டு உள்ளனர்.
