கொல்கத்தா:
கொல்கத்தாவில் ஒரே நாளில் திரிணமூல் காங்கிரஸ் தலைவர் மம்தா பானர்ஜி தலைமையில் ஒரு பேரணியும், திரிணமூல் அதிருப்தி அணியினர் கலந்துகொண்ட பேரணியும் நடைபெற்றதால் பரபரப்பு ஏற்பட்டது.
கடந்த ஏப்ரல் மாதம் நடைபெற்ற மேற்கு வங்க சட்டப் பேரவைத் தேர்தலில் மம்தா பானர்ஜி தலைமையிலான திரிணமூல் காங்கிரஸ் 80 இடங்களில் மட்டுமே வெற்றி பெற்று ஆட்சியை இழந்தது.
தேர்தலுக்குப் பின்னர் மம்தா தலைமை மீது அதிருப்தி கொண்ட 58 எம்எல்ஏக்கள் கட்சியிலிருந்து விலகி தனி அணியாக செயல்பட்டு வருகின்றனர்.
அதைப் போலவே மக்களவையில் இருந்த 28 திரிணமூல் காங்கிரஸ் எம்.பி.க்களில் 20 பேர் கட்சியிலிருந்து விலகி இந்திய தேசிய குடிமக்கள் கட்சியில் இணைந்து தனியாக செயல்பட்டு வருகின்றனர்.
ஆட்சியையும் இழந்து, கட்சி எம்எல்ஏக்கள், எம்பிக்கள் பலரையும் இழந்துள்ள மம்தா பானர்ஜி, கட்சியை மறுசீரமைக்கும் பணியில் ஈடுபட்டு வருகிறார்.
இந்நிலையில் 1993-ல் கலவரத்தில் உயிரிழந்த 13 இளைஞர் காங்கிரஸ் கட்சி நிர்வாகிகளின் நினைவாக ‘ஷாஹித் திவஸ்’ என்ற பேரணியை கொல்கத்தாவில் நேற்று பிர்லா கோளரங்கம் அருகே மம்தா பானர்ஜி தலைமையிலான திரிணமூல் காங்கிரஸார் நடத்தினர்.
அதேநேரத்தில் மகாத்மா காந்தி சிலை அருகே, அதிருப்தி திரிணமூல் காங்கிரஸ் கட்சியினரும் இதுபோன்ற தியாகிகள் தின பேரணியை நடத்தினர். இரண்டுமே ஒரே நேரத்தில் நடைபெற்றதால் சிறிது நேரம் அங்கு பரபரப்பு ஏற்பட்டது.
ஆனால் இரு பேரணிகள் நடந்த இடத்திலும் போலீஸார் குவிக்கப்பட்டு இருந்ததால் அங்கு பிரச்சினை ஏதும் ஏற்படாமல் சுமூகமாக முடிவடைந்தது.
மேலும், காங்கிரஸ் கட்சி சார்பிலும், நினைவேந்தல் பேரணி நேற்று கொல்கத்தாவில் நடைபெற்றது.
பேரணியில் கலந்துகொண்ட திரிணமூல் தொண்டர்களிடையே மம்தா பேசியதாவது:
நமது கட்சியிலிருந்து விலகி செயல்படும் கட்சி நிர்வாகிகள் திருடர்கள். அவர்களை மன்னிக்கவே கூடாது. நமது கட்சியிலிருந்து பிரிந்து பாஜகவில் இணைந்தவர்கள் தைரியமற்ற கோழைகள்.
அவர்களுக்கு தைரியம் இருந்தால், பாஜகவில் இணைந்த பின்னர் தேர்தலில் போட்டியிட வேண்டும்.
திரிணமூல் காங்கிரஸ் கட்சி சின்னத்தில் வெற்றி பெற்றுவிட்டு முதுகில் குத்திய துரோகிகளை நான் மன்னிக்க மாட்டேன். இவ்வாறு அவர் பேசினார்.
