மதுரை:
திருச்செந்தூர் கோயிலில் சஷ்டி யாகசாலை இந்தாண்டும், வரும் ஆண்டும் வழக்கமான இடத்திலேயே செயல்பட வேண்டும் என உயர் நீதிமன்றம் உத்தரவிட்டது.
திருச்செந்தூர் சிவராம சுப்பிரமணிய சாஸ்திரி, உயர் நீதிமன்ற மதுரை அமர்வில் தாக்கல் செய்த மனுவில்,’திருச்செந்தூரில் நவ.10-ல் தொடங்கும் கந்த சஷ்டி விழாவுக்கான யாகசலையை வேறு இடத்துக்கு மாற்ற அறநிலையத் துறை முடிவு செய்துள்ளது.
ஆகம விதிகளுக்கு முரணாக யாகசாலையை வேறு இடத்துக்கு மாற்றக் கூடாது என உத்தரவிட வேண்டும்’ என்று கூறியிருந்தார்.
இதே கோரிக்கைக்காக கோயில் ஸ்வாந்திர பிரபாலன ஸ்தலாத்தார் சபையின் செயலாளர் முத்துகிருஷ்ணன் அய்யர் மனு தாக்கல் செய்திருந்தார்.
இரு மனுக்களிலும் திருச்செந்தூர் கோயில் வளாகத்தில் வள்ளி, தெய்வானை சந்நிதிகளுக்கு இடையே உள்ள முதலாவது பிரகாரத்தில் சஷ்டி யாகசாலையை வேறு இடத்துக்கு மாற்றக்கூடாது எனத் தெரிவிக்கப்பட்டது.
இந்த மனுக்கள் நீதிபதிகள் ஜி.ஆர்.சுவாமிநாதன், பி.முருகன் அமர்வில் விசாரணைக்கு வந்தன. அரசுத் தரப்பில், ‘யாகசாலை தொடர்பாக அறங்காவலர்கள் குழு இன்னும் இறுதி முடிவெடுக்கவில்லை. அதற்குள் மனுத் தாக்கல் செய்யப்பட்டுள்ளது.
யாகசாலை தொடர்பாக 2009-ல் ரிட் மேல்முறையீட்டு மனுவில் தெளிவான தீர்ப்பு வழங்கப்பட்டுள்ளது. அதன் அடிப்படையில் இந்த மனுக்கள் விசாரணைக்கு உகந்தது அல்ல’ எனத் தெரிவிக்கப்பட்டது.
இதையடுத்து நீதிபதிகள் பிறப்பித்த உத்தரவு: கோயில்களில் பன்னெடுங்காலமாகக் கடைப்பிடிக்கப்படும் நடைமுறையிலிருந்து விலகுவதை நியாயப்படுத்த முடியாது.
அரசுத் தரப்பில் சுட்டிக்காட்டியுள்ள 2009 உத்தரவை கவனமாக ஆய்வு செய்தபோது, கோயில் நிர்வாகம் யாகசாலையை கோயில் சுற்றுச் சுவருக்கு வெளியே அமைக்கத் திட்டமிட்டபோது அது ஆகம விதிகளுக்கு முரணானது என்று கூறி எதிர்ப்புத் தெரிவிக்கப்பட்டது.
அதில், கோயிலுக்குள் யாகசாலை அமைக்கும் வழக்கத்தை மாற்றவே முடியாத ஒரு கட்டாய மத நடைமுறையாகக் கருதப்பட முடியாது.
யாகசாலையை கோயிலுக்கு வெளியே அமைப்பதற்குத் தடை ஏதும் இல்லாதவரை இது அரசியலமைப்புச் சட்டத்தை மீறிய செயலாகாது எனத் தெரிவிக்கப்பட்டுள்ளது.
இந்த முடிவிலிருந்து நாங்கள் மாறுபடுகிறோம். இது 2009 உத்தரவிலேயே ஒப்புக்கொள்ளப்பட்டது. இருப்பினும் இந்த உத்தரவு சரியானதா? இல்லையா? என்பதை மறுபரிசீலனை செய்ய 3 நீதிபதிகள் அமர்வு அமைப்பதற்கான வழக்கு ஆவணங்களை தலைமை நீதிபதிக்கு அனுப்ப பதிவுத்துறைக்கு உத்தரவிடப்படுகிறது.
இருப்பினும் அவசரம் இருப்பதால் இடைக்கால நிவாரணம் வழங்க முடிவு செய்யப்படுகிறது. 2009-ம் ஆண்டின் ரிட் மேல்முறையீட்டு மனுவில் முரணான தீர்ப்பு இல்லாமல் இருந்தால் மனுக்களை நேரடியாக அனுமதித்திருப்போம்.
யாகசாலை எப்போதும் இருந்த இடத்திலேயே அமைய வேண்டும் என்று ‘வித்யாகர்’ கூறும்போது கோயில் நிர்வாகத்தினர் அதற்கேற்பச் செயல்பட வேண்டியது அவசியமாகும்.
எனவே, யாகசாலையை வேறு இடத்துக்கு மாற்ற இடைக்காலத் தடை விதிக்கிறோம். இந்த ஆண்டும் வரும் ஆண்டுகளிலும் ‘ஸ்கந்த சஷ்டி’ யாகசாலை வழக்கமான இடத்திலேயே அமைக்கப்பட வேண்டும்.
இந்த இடைக்கால உத்தரவு முதன்மை ரிட் மனுவின் இறுதித் தீர்ப்புக்கு உட்பட்டது. இவ்வாறு நீதிபதிகள் உத்தரவில் கூறியுள்ளனர்.
