சர்வதேச கிரிக்கெட் கவுன்சிலின் தலைவராக பிசிசிஐ செயலாளர் ஜெய் ஷா நியமிக்கப்படுகிறார்.
சர்வதேச கிரிக்கெட் கவுன்சிலின் (ஐ.சி.சி) தற்போதைய தலைவராக நியூசிலாந்தைச் சேர்ந்த கிரேக் பார்க்லே இருந்து வருகிறார். இவரது பதவிக்காலம் வரும் நவம்பர் மாதம் 30ம்தேதியுடன் முடிவடைகிறது.
ஏற்கனவே 2 முறை ஐ.சி.சியின் தலைவர் பதவியை வகித்த அவர், 3 வது முறையாக தாம் தலைவர் பதவியில் போட்டியிடப் போவதில்லை என அறிவித்திருந்தார்.
இதனையடுத்து ஐ.சி.சி தலைவர் பதவிக்கான தேர்தல் அறிவிக்கப்பட்டது. விருப்பமுள்ளவர்கள் ஆகஸ்ட் 27ம் தேதிக்குள் வேட்புமனுக்களை தாக்கல் செய்யலாம் என்றும்,புதிதாக தேர்ந்தெடுக்கபடுபவரின் பதவிக்காலம் 3 ஆண்டுகள் இருக்கும் எனவும் அறிவித்திருந்தது.
ஐ.சி.சி.-ன் தலைவராக பி.சி.சி.ஐ. செயலாளர் ஜெய் ஷாவுக்கு அதிக வாய்ப்புள்ளதாக தகவல்கள் வெளியாகி வந்தன.
அதன்படியே தற்போது ஒன்றிய உள்துறை அமைச்சர் அமித்ஷாவின் மகன் ஜெய் ஷா , சர்வதேச கிரிக்கெட் கவுன்சிலின் தலைவராகிறார்.
இதன் மூலம் சர்வதேச கிரிக்கெட் கவுன்சில் தலைவராகும் மூன்றாவது இந்தியர் என்கிற பெருமையை ஜெய் ஷா பெற்றுள்ளார்.
இவரது பதவிக்காலம் டிசம்பர் 1ம் தேதி ஆரம்பமாகி 3 ஆண்டுகள் இருக்கும் என தெரிவிக்கப்பட்டுள்ளது.
