திருநெல்வேலி:
“எடுத்தவுடனேயே ‘லாங் ஜம்ப்’ செய்து உலகத்தையே தாண்டுவேன் என்று சொல்வது சரியாக இருக்காது. விஜய் தேர்தலில் நின்று தன் பலத்தை நிரூபித்த பிறகு பேசலாம்” என தமிழக பாஜக தலைவர் நயினார் நாகேந்திரன் தெரிவித்துள்ளார்.
திருநெல்வேலியில் செய்தியாளர்களிடம் அவர் கூறியதாவது: நான் யாரையும் சந்திப்பதற்காக டெல்லி செல்லவில்லை.
அது என்னுடைய சொந்தப் பயணம். முந்தாநாள் மதியம் சென்றுவிட்டு நேற்று காலையில் திரும்பிவிட்டேன். இதில் அரசியல் உள்நோக்கம் எதுவும் இல்லை.
முன்னாள் அமைச்சர் செங்கோட்டையன் அதிமுகவிலிருந்து விலகி விஜயின் தமிழக வெற்றிக் கழகத்தில் இணைந்திருப்பதால் அதிமுக-பாஜக கூட்டணிக்கு பின்னடைவில்லை.
செங்கோட்டையன் 1977 முதல் அரசியலில் இருக்கும் 50 ஆண்டுகால மூத்த தலைவர். அவர் எம்ஜிஆர், ஜெயலலிதா மற்றும் எடப்பாடி பழனிசாமி ஆகியோரின் அமைச்சரவையில் பணியாற்றியவர்.
அதிமுகவை பொறுத்தவரை அதற்கென தனி வாக்கு வங்கி உள்ளது. ஒரு தலைவர் விலகிச் செல்வதால் அந்த வாக்கு வங்கி அப்படியே அவருடன் செல்லுமா என்பது கேள்விக்குறிதான்.
தேர்தலுக்குப் பின்னரே அதன் தாக்கம் தெரியும். இதனால் பாஜக கூட்டணிக்கு எந்தப் பாதிப்பும் இல்லை.
தேமுதிக பொதுச்செயலாளர் பிரேமலதா விஜயகாந்த் 2026-ல் கூட்டணி ஆட்சி அமையும் எனக் கூறி உள்ளார். கருத்து சொல்ல அனைவருக்கும் உரிமை உண்டு.
ஆனால் எஜமானர்களான வாக்காளர்களே அதை முடிவு செய்வார்கள். 2006-ல் திமுக மைனாரிட்டி அரசை அமைத்ததைத் தவிர, தமிழக வரலாறு முழுவதும் தனிப்பெரும்பான்மை ஆட்சியைத்தான் மக்கள் தேர்வு செய்துள்ளனர்.
திமுக ஆட்சிக்கு வந்த பிறகு சொத்துவரி மற்றும் மின்கட்டணத்தை 300% உயர்த்தியுள்ளது. சொன்ன வாக்குறுதிகளை நிறைவேற்றவில்லை.
ஆனால், பொங்கல் பண்டிகை வரவுள்ள நிலையில், கடந்த முறை ரூ.1000 கொடுத்தார்கள். இந்த முறை மக்கள் ரூ.5000 எதிர்பார்க்கிறார்கள்.
முதலமைச்சர் என் தொகுதிக்கு பாலம், ரோடு, கல்லூரி என நிறைய நன்மைகளைச் செய்துள்ளார். அதேபோல் மக்களுக்கும் பொங்கல் பரிசாக ரூ.5000 வழங்க வேண்டும் என்று நானும் கேட்டுக்கொள்கிறேன்.
மக்கள் ரூ.1 லட்சம் வரை நஷ்டத்தில் இருக்கும்போது, வெறும் ரூ.1000 கொடுத்தால் ஓட்டு போடுவார்களா என்பது சந்தேகமே. மின்சாரம், பால் விலை உயர்வால் மக்கள் பாதிக்கப்பட்டுள்ளனர்.
பாஜக 1600-க்கும் மேற்பட்ட எம்.எல்.ஏக்கள், 300-க்கும் மேற்பட்ட எம்பிக்களைக் கொண்ட உலகின் மிகப்பெரிய கட்சி. தம்பி விஜய் இப்போதுதான் கட்சி ஆரம்பித்திருக்கிறார். அவர் இன்னும் ஒரு கவுன்சிலர் கூட ஆகவில்லை.
எடுத்தவுடனேயே ‘லாங் ஜம்ப்’ செய்து உலகத்தையே தாண்டுவேன் என்று சொல்வது சரியாக இருக்காது. விஜய் தேர்தலில் நின்று தன் பலத்தை நிரூபித்துவிட்டு பிறகு பேசலாம். எம்ஜிஆர் கட்சி ஆரம்பிக்கும் முன்பே எம்எல்ஏவாகவும், திமுகவின் முகமாகவும் இருந்தார். ஆனால் விஜய் இப்போது நடிகராக மட்டுமே உள்ளார்.
அதிமுகவில் இருந்துகொண்டு பாஜகவை நம்பினோம் என்று சொல்வது எப்படிப் பொருத்தமாக இருக்கும். செங்கோட்டையன் விலகலின் பின்னணியில் பாஜக இருப்பதாகத் திருமாவளவன் சொல்வது தவறானது.
பாஜக பின்னணியில் இருந்தால் அவர் ஏன் தவெக-விற்கு செல்ல வேண்டும், பாஜகவிற்கே வந்திருக்கலாமே. டிடிவி தினகரன் கூறியது போல் மூன்றாவது அணி அமைந்தாலும், நான்காவது அணி அமைந்தாலும், 2026-ல் தேசிய ஜனநாயக கூட்டணிதான் ஆட்சியைப் பிடிக்கும்” என்றார்.
மேலும், எடப்பாடி பழனிசாமியின் போக்கு காரணமாகவே நிர்வாகிகள் வெளியேறுகிறார்களா என்று கேட்கிறீர்கள், ‘அடுத்த கட்சிகளின் உள்கட்சி விவகாரங்கள் குறித்து பேசுவது நாகரிகமாக இருக்காது’ என்றார்.
