பெய்ஜிங்:
அமெரிக்க ராணுவத்துக்கு இணையாக சீன ராணுவத்தின் பலம் தொடர்ந்து அதிகரிக்கப்பட்டு வருகிறது. சீன ராணுவத்தில் ஏற்கெனவே ரோபோ நாய்கள் சேர்க்கப்பட்டு உள்ளன. அடுத்த கட்டமாக ரோபோ வீரர்கள் சேர்க்கப்பட உள்ளனர்.
இது தொடர்பாக சீனாவின் யுபி டெக் ரோபோடிக்ஸ் நிறுவனத்துக்கும் சீன ராணுவத்துக்கும் இடையே அண்மையில் ரூ.330 கோடியில் ஒப்பந்தம் கையெழுத்தானது.
இதன்படி யுபி டெக் ரோபோடிக்ஸ் சார்பில் இந்த ஆண்டு இறுதிக்குள் மனித வடிவிலான 500 ரோபோக்கள் சீன ராணுவத்தில் ஒப்படைக்கப்பட உள்ளன. இவற்றை வியட்நாம் எல்லைப் பகுதியில் ரோந்து பணியில் ஈடுபடுத்த சீன ராணுவம் திட்டமிட்டுள்ளது. படிப்படியாக சீன எல்லைப் பகுதிகள் முழுவதும் ரோபோ வீரர்களை நிறுத்த முடிவு செய்யப்பட்டிருக்கிறது.
இதுதொடர்பாக யுபி டெக் ரோபோடிக்ஸ் வட்டாரங்கள் கூறியதாவது: 1.76 மீட்டர் உயரத்தில் ரோபோக்களை தயாரிக்கிறோம். இதற்கு வால்கர் எஸ் 2 என்று பெயரிட்டு உள்ளோம். இதன் ஒரு கரத்தில் 15 கிலோ வரையிலான பொருட்களை தூக்கிச் செல்ல முடியும். இது செயற்கை நுண்ணறிவு தொழில்நுட்பத்தில் செயல்படும்.
உலகத்திலேயே முதல்முறையாக இதில் 2 பேட்டரிகளை பொருத்தியிருக்கிறோம். ஒரு பேட்டரியில் சார்ஜ் குறைந்தால் மற்றொரு பேட்டரி மூலம் ரோபோ தொடர்ந்து செயல்படும்.
சார்ஜ் குறைந்த பேட்டரியை ரோபோ தானாகவே அகற்றி சார்ஜ் செய்து கொள்ளும். இதன்மூலம் 24 மணி நேரமும் வால்கர் எஸ் 2 ரோபோவால் செயல்பட முடியும்.
இந்த ரோபோ ஒரு விநாடிக்கு 2 மீட்டர் கடந்து செல்லும். செயற்கை நுண்ணறிவு தொழில்நுட்பத்தின் மூலம் எந்தவொரு பணிக்கும் அதனை பயன்படுத்தி கொள்ள முடியும். இது மனிதர்களை போன்றே செயல்படும். இவ்வாறு அந்த வட்டாரங்கள் தெரிவித்தன.
கின்னஸ் சாதனை: சீனாவின் ஷாங்காய் நகரில் உள்ள ரோபோ தயாரிப்பு நிறுவனம் ஏஜிபாட். இந்நிறுவனம் ‘ஏஜிபாட் ஏ2’ என்ற மனித ரோபோ ஒன்றை உருவாக்கியது. 169 செ.மீ உயரமுள்ள இந்த மனித ரோபோ சில்வர் மற்றும் கருப்பு நிறுத்தில் தயாரிக்கப்பட்டது. இதை நெடுஞ்சாலையில் தானாக நடக்க வைக்க முடிவு செய்யப்பட்டது.
சீனாவின் சூசோ நகரில் கடந்த 10-ம் தேதி மாலை தனது நடைபயணத்தை தொடங்கியது ஜிபாட் ஏ2. நெடுஞ்சாலைகள், நகரங்களின் சாலைகள் ஆகியவற்றை கடந்து சென்று கடந்த 13-ம் தேதி ஹாங்காய் நகரின் வாட்டர் ஃபிரன்ட் பண்ட் பகுதியை அடைந்தது.
செல்லும் வழியில் போக்குவரத்து விதிகளையும் பின்பற்றி ஏஜிபாட் ஏ நடந்து சென்றது. 3 நாட்களில் மொத்தம் 106 கிலோ மீட்டர் தூரம் நடந்து சென்றது. மனித ரோபோ இவ்வளவு தூரம் தொடர்ந்து நடந்து சென்றது இதுவே முதல் முறை என்பதால், ஏஜிபாட் ஏ நடை பயணம் கின்னஸ் சாதனை புத்தகத்தில் இடம் பெற்றுள்ளது.
