ஹராரே:
இந்தியா – ஜிம்பாப்வே அணிகள் இடையிலான 2-வது டி20 கிரிக்கெட் போட்டி ஹராரே ஸ்போர்ட்ஸ் கிளப் மைதானத்தில் இன்று மாலை 4.30 மணிக்கு நடைபெறுகிறது.
ஸ்ரேயஸ் ஐயர் தலைமையிலான இந்திய கிரிக்கெட் அணி, ஜிம்பாப்வேயில் சுற்றுப்பயணம் செய்து விளையாடி வருகிறது.
இரு அணிகள் இடையிலான 3 ஆட்டங்கள் கொண்ட டி20 கிரிக்கெட் தொடரில் ஹராரேவில் நடைபெற்ற முதல் போட்டியில் இந்திய அணி 7 விக்கெட்கள் வித்தியாசத்தில் வெற்றி பெற்றது.
இந்த ஆட்டத்தில் 126 ரன்கள் இலக்கை துரத்திய இந்திய அணி 13.2 ஓவர்களில் 3 விக்கெட்களை மட்டும் இழந்து வெற்றி கண்டிருந்தது.
இதன் மூலம் கேப்டனாக ஸ்ரேயஸ் ஐயர் முதல் வெற்றியை பதிவு செய்திருந்தார்.
ஏனெனில் அவர், தலைமையில் இந்திய அணி 7 ஆட்டங்களில் ஒன்றில் கூட வெற்றி பெறாமல் இருந்தது. தற்போதைய வெற்றி இந்திய அணியின் நம்பிக்கையை அதிகரிக்கச் செய்யும்.
முதல் ஆட்டத்தில் பந்துவீச்சில் மயங்க் யாதவ், பிரின்ஸ் யாதவ் ஆகியோர் சிறப்பாக செயல்பட்டு இருந்தனர். அதேவேளையில் பேட்டிங்கில் 15 வயதாகும் வைபவ் சூர்யவன்ஷி 18 பந்துகளில் அரை சதம் அடித்து அசத்தியிருந்தார்.
மேலும் இஷான் கிஷன் 35, ஸ்ரேயஸ் ஐயர் 28 ரன்கள் சேர்த்திருந்தனர். இவர்களிடம் இருந்து மேலும் ஒரு சிறந்த செயல் திறன் வெளிப்படக்கூடும்.
தொடரில் 1-0 என முன்னிலை வகிக்கும் இந்திய அணி இன்றைய ஆட்டத்தில் வெற்றி பெறும் பட்சத்தில் டி 20 தொடரை கைப்பற்றும்.
முதல் ஆட்டத்தில் ஒரு ரன்னில் ஆட்டமிழந்து ஏமாற்றம் அளித்த அபிஷேக் சர்மா மட்டையை சுழற்றுவதில் கூடுதல் கவனம் செலுத்தக்கூடும்.
சிகந்தர் ராசா தலைமையிலான ஜிம்பாப்வே அணி முதல் போட்டியில் பவர்பிளேவில் அதிக விக்கெட்களை பறிகொடுத்ததால் சரிவில் இருந்து மீளமுடியாமல் போனது.
இன்றைய ஆட்டத்தில் தோல்வி அடைந்தால் தொடரை இழக்க நேரிடும் என்பதால் ஜிம்பாப்வே அணி வீரர்கள் வெற்றி பெற போராடக்கூடும்.
