சென்னை:
ஆருத்ரா நிறுவனம் தொடர்புடைய இடங்களில் அமலாக்கத்துறை நடத்திய சோதனையில் ரூ.1.50 கோடி சொத்து ஆவணங்கள், ரூ.22 லட்சம் பணம் பறிமுதல் செய்யப்பட்டுள்ளது.
சென்னை அமைந்தகரையை தலைமையிடமாகக் கொண்டு செயல்பட்டு வந்த ஆருத்ரா கோல்டு டிரேடிங் என்ற நிதி நிறுவனம் 2020-22 வரை, முதலீட்டாளர்கள் ஒரு லட்சம் பேருக்கு அதிக வட்டி தருவதாகக் கூறி ரூ.2,438 கோடி மோசடி செய்ததாக புகார் எழுந்தது.
இதையடுத்து பொருளாதார குற்றப்பிரிவு போலீஸார், அந்நிறுவனத்தின் இயக்குநர்கள் ராஜசேகர், அவரது மனைவி உஷா உள்ளிட்ட 24 பேர் மீது வழக்குப்பதிவு செய்து விசாரணை நடத்தி வந்தனர். இதில் சட்டவிரோத பணப்பரிவர்த்தனை நடந்திருப்பது தெரியவந்தது.
இதையடுத்து, பொருளாதார குற்றப்பிரிவு பதிவு செய்த முதல் தகவல் அறிக்கை அடிப்படையில் அமலாக்கத் துறையும் தனியாக வழக்குப்பதிவு செய்து விசாரணை மேற்கொண்டு வந்தது. இதன் தொடர்ச்சியாக சென்னை உட்பட 15-க்கும் மேற்பட்ட இடங்களில் அமலாக்கத் துறை நேற்று முன்தினம் சோதனை நடத்தியது.
சோதனை தொடர்பாக அமலாக்கத் துறை வெளியிட்டுள்ள செய்திக்குறிப்பு: ஆருத்ரா நிறுவனம் பல்வேறு வட்டி சலுகைகளை அறிவித்து 1,04,433 பேரிடமிருந்து ரூ.2,438 கோடி வைப்புத் தொகையாகப் பெற்று மோசடி செய்துள்ளது.
இந்த வழக்கில் இதுவரை பொருளாதார குற்றப்பிரிவு 40 தனி நபர்கள், நிறுவனங்கள் மீது குற்றப்பத்திரிகை தாக்கல் செய்துள்ளது.
இந்நிலையில் அமலாக்கத் துறை விசாரணையில், ஆருத்ரா நிறுவனத்தின் வங்கிக் கணக்குகள் மற்றும் தொடர்புடைய நிறுவனங்களின் கணக்குகளில் சுமார் ரூ.2 ஆயிரம் கோடி பரிவர்த்தனைகள் நடந்திருப்பது தெரிய வந்துள்ளது.
மேலும் ரூ.10 லட்சத்துக்கு மேல் நடைபெற்ற 1,230 பரிவர்த்தனைகள் பகுப்பாய்வு செய்யப்பட்டன.
இதில் பெரும்பாலான பரிவர்த்தனைகள், பொதுமக்களின் வைப்புத் தொகையைத் தனிப்பட்ட மற்றும் வர்த்தகம் அல்லாத நோக்கங்களுக்காக நிறுவனத்தின் பல வங்கிக் கணக்குகளுக்கு மாற்றப்பட்டிருப்பது தெரியவந்தது.
மேலும் இதில் ஆருத்ரா நிறுவனத்தின் சில இயக்குநர்கள் பெயரளவிலானவர்கள் என்றும், மோசடியில் அவர்களுக்கு எந்தப் பங்கும் இல்லை என்றும் தெரியவந்தது.
இதையடுத்து நேற்று முன்தினம் சென்னை, காஞ்சிபுரம், மும்பை, கொல்கத்தா உள்ளிட்ட 21 இடங்களில் நடத்தப்பட்ட சோதனையில் ரூ.1.50 கோடி மதிப்புள்ள சொத்து ஆவணங்கள், ரூ.22 லட்சம் பணம், மோசடி தொடர்பான ஆவணங்கள், டிஜிட்டல் ஆதாரங்கள், சொத்து உரிமை ஆவணங்கள், நிதிப் பட்டுவாடா மற்றும் பிற முதலீடுகள் தொடர்பான ஆவணங்கள் பறிமுதல் செய்யப்பட்டுள்ளன. இவ்வாறு அதில் கூறப்பட்டுள்ளது.
