சென்னை:
சர்வதேச ஹாக்கி சம்மேளனத்தின் 14-வது ஆடவர் ஹாக்கி ஜூனியர் உலகக் கோப்பை தொடர் இன்று (நவ.28) முதல் வரும் டிசம்பர் 10-ம் தேதி வரை சென்னை மற்றும் மதுரையில் நடைபெற உள்ளது.
இதில் போட்டியை நடத்தும் இந்தியா உள்ளிட்ட 24 அணிகள் கலந்து கொள்கின்றன. இவை 6 பிரிவுகளாக பிரிக்கப்பட்டுள்ளன.
ஒவ்வொரு பிரிவிலும் நான்கு அணிகள் இடம் பெற்றுள்ளன. நடப்பு சாம்பியனான ஜெர்மனி ‘ஏ’ பிரிவில் இடம் பெற்றுள்ளது.
இதே பிரிவில் தென் ஆப்பிரிக்கா, கனடா, அயர்லாந்து அணிகளும் இடம் பெற்றுள்ளன.போட்டியை நடத்தும் இந்தியா ‘பி’ பிரிவில் இடம் பெற்றுள்ளது. இதே பிரிவில் ஓமன், சிலி, சுவிட்சர்லாந்து ஆகிய அணிகளும் உள்ளன.
‘சி’ பிரிவில் 2021-ம் ஆண்டு சாம்பியனான அர்ஜெண்டினா, நியூஸிலாந்து, ஜப்பான், சீனா ஆகிய அணிகள் இடம் பிடித்துள்ளன. ‘டி’ பிரிவில் ஸ்பெயின், பெல்ஜியம், எகிப்து, நமீபியா ஆகிய அணிகளும், ‘இ’ பிரிவில் நெதர்லாந்து, மலேசியா, இங்கிலாந்து, ஆஸ்திரியா ஆகிய அணிகளும் ‘எஃப்’ பிரிவில் பிரான்ஸ், ஆஸ்திரேலியா, கொரியா, வங்கதேசம் ஆகிய அணிகளும் இடம்பெற்றுள்ளன.
லீக் சுற்றில் ஒவ்வொரு அணியும் தனது பிரிவில் இடம் பெற்றுள்ள மற்ற அணிகளுடன் தலா ஒரு முறை மோதும். லீக் சுற்றின் முடிவில் ஒவ்வொரு பிரிவிலும் முதலிடம் பிடிக்கும் அணிகள் கால்இறுதிக்கு முன்னேறும்.
இந்த 6 அணிகளுடன் லீக் சுற்றில் 2-வது இடத்தை பிடிக்கும் 2 சிறந்த அணிகளும் கால் இறுதி சுற்றில் இணையும். கால் இறுதி ஆட்டங்கள் டிசம்பர் 5-ம் தேதி சென்னையில் நடைபெறுகிறது.
தொடர்ந்து அரை இறுதி ஆட்டங்கள் டிசம்பர் 7-ம் தேதியும் இறுதிப் போட்டி 10-ம் தேதியும் சென்னையில் நடைபெறுகின்றன.
லீக் சுற்றில் தொடக்க நாளான இன்று மதுரையில் காலை 9 மணிக்கு நடைபெறும் ஆட்டத்தில் 7 முறை சாம்பியனான ஜெர்மனி அணி, தென் ஆப்பிரிக்காவுடன் மோதுகிறது.
தொடர்ந்து 11.15 மணிக்கு நடைபெறும் 2-வது ஆட்டத்தில் கனடா – அயர்லாந்து அணிகள் மோதுகின்றன.
தொடர்ந்து பிற்பகல் 1.15 மணிக்கு சென்னை எழும்பூரில் உள்ள மேயர் ராதாகிருஷ்ணன் ஹாக்கி மைதானத்தில் நடைபெறும் ஆட்டத்தில் அர்ஜெண்டினா, ஜப்பானை சந்திக்கிறது.
அதேவேளையில் 1.30 மணிக்கு மதுரையில் நடைபெறும் ஆட்டத்தில் ஸ்பெயின் – எகிப்து அணிகள் மோதுகின்றன.
இதன் பின்னர் 3.30 மணிக்கு சென்னையில் நடைபெறும் ஆட்டத்தில் நியூஸிலாந்து, சீனாவை எதிர்கொள்கிறது. 3.45 மணிக்கு மதுரையில் நடைபெறும் ஆட்டத்தில் பெல்ஜியம் – நமீபியா அணிகள் மோதுகின்றன.
மாலை 5.45 மணிக்கு சென்னையில் நடைபெறும் ஆட்டத்தில் ஓமன் – சுவிட்சர்லாந்துடன் மோதுகிறது. இதைத் தொடர்ந்து இரவு 8.30 மணிக்கு நடைபெறும் ஆட்டத்தில் தொடரை நடத்தும் இந்திய அணி, சிலியுடன் பலப்பரீட்சை நடத்துகிறது.
ஆடவர் ஜூனியர் ஹாக்கி உலகக் கோப்பை தொடரில் சென்னையில் நடைபெறும் லீக் ஆட்டங்களில் பங்கேற்கும் இந்தியா உள்ளிட்ட 12 அணிகளின் கேப்டன்கள் கோப்பையுடன் கொடுத்த உற்சாக போஸ்.
4-வது முறையாக..: ஆடவர் ஹாக்கி ஜூனியர் உலகக் கோப்பை தொடரை இந்தியா நடத்துவது இது 4-வது முறையாகும். இதற்கு முன்னர் 2013-ல் டெல்லியிலும், 2016-ல் லக்னோவிலும், 2021-ல் புவனேஷ்வரிலும் நடைபெற்றிருந்தது. இதில் 2016-ம் ஆண்டு தொடரில் இந்திய அணி சாம்பியன் பட்டம் வென்றிருந்தது.
இந்திய அணியின் ஆட்டங்கள்: ஆடவர் ஜூனியர் உலகக் கோப்பை ஹாக்கி தொடரில் இந்திய அணி தனது முதல் லீக் ஆட்டத்தில் இன்று (28-ம் தேதி) சிலியுடன் மோதுகிறது. தொடர்ந்து 29-ம் தேதி நடைபெறும் ஆட்டத்தில் இந்திய அணி, ஓமனுடன் பலப்பரீட்சை நடத்துகிறது.
இந்திய அணி தனது கடைசி லீக் ஆட்டத்தில் டிசம்பர் 2-ம் தேதி சுவிட்சர்லாந்துடன் மோதுகிறது.
இந்தியா 2 முறை சாம்பியன்: ஜூனியர் உலகக் கோப்பை ஹாக்கியில் 2001-ல் ஆஸ்திரேலியாவின் ஹோபர்ட் நகரில் நடைபெற்ற தொடரிலும், 2016-ல் லக்னோவில் நடைபெற்ற தொடரிலும் இந்திய அணி பட்டம் வென்றிருந்தது.
தற்போது சொந்த மண்ணில் போட்டி நடைபெறுவதால் இந்திய அணி மீது அதிக எதிர்பார்ப்பு உள்ளது.
கடைசியாக கோலாலம்பூரில் 2023-ம் ஆண்டு நடைபெற்ற தொடரில் இந்திய அணி 4-வது இடம் பிடித்திருந்தது.
அந்தத் தொடரில் வெண்கலப் பதக்கத்துக்கான ஆட்டத்தில் இந்திய அணி 1-3 என்ற கோல் கணக்கில் ஸ்பெயினிடம் வீழ்ந்திருந்தது.
ரூ.65 கோடி செலவில்… – ஆடவர் ஹாக்கி ஜூனியர் உலகக் கோப்பை தொடரில் இம்முறை அணிகளின் எண்ணிக்கை 16-ல் இருந்து 24 ஆக அதிகரிக்கப்பட்டுள்ளது. இந்த உலகக் கோப்பை தொடரை நடத்துவதற்காக தமிழக அரசு ரூ.65 கோடியை ஒதுக்கியுள்ளது.
இதுவரை சாம்பியன்கள்: 1979 பாகிஸ்தான், 1982 ஜெர்மனி, 1985 ஜெர்மனி, 1989 ஜெர்மனி, 1993 ஜெர்மனி, 1997 ஆஸ்திரேலியா, 2001 இந்தியா, 2005 அர்ஜெண்டினா, 2009 ஜெர்மனி, 2013 ஜெர்மனி, 2016 இந்தியா, 2021 அர்ஜெண்டினா, 2023 ஜெர்மனி.
