புதுடெல்லி:
ஸ்ரேயஸ் ஐயர் தலைமையிலான இந்திய கிரிக்கெட் அணி சமீபத்தில் ஜப்பானில் நடைபெற்ற ஆசிய விளையாட்டு போட்டியில் பாகிஸ்தான் அணியை 19 ரன்கள் வித்தியாசத்தில் வீழ்த்தி தங்கப் பதக்கம் வென்றது.
இந்தத் தொடரில் இந்திய அணியின் பயிற்சியாளராக பிசிசிஐ-யின் சிறப்பு மையத்தின் இயக்குநரான விவிஎஸ் லட்சுமண் பணியாற்றி இருந்தார்.
இந்நிலையில் ஸ்ரேயஸ் ஐயரின் கேப்டன்ஷிப்பை லட்சுமண் வெகுவாக பாராட்டி உள்ளார்.
இதுதொடர்பாக அவர், பிசிசிஐ டி.வி.க்கு அளித்துள்ள நேர் காணலில் கூறியிருப்பதாவது: கேப்டன்சி பயணத்தை தற்போதுதான் ஸ்ரேயஸ் ஐயர் தொடங்கி உள்ளார்.
ஆனால், அவர் நிறைய வெற்றிகளைப் பெறுவார் என்பதில் எனக்கு நம்பிக்கை உள்ளது.
அவர், வீரர்களின் கேப்டன். அணியில் உள்ள அனைவரையும் மிகவும் வசதியாக உணரச் செய்கிறார். தானும் முன்னுதாரணமாக இருந்து வழிநடத்துகிறார்.
பேட்டிங் அல்லது பீல்டிங் என எதுவாக இருந்தாலும், அணிக் கூட்டத்துக்கு முன்பே எதிரணியின் பலம், பலவீனங்கள் மற்றும் அதற்கான திட்டங்களை ஸ்ரேயஸ் ஐயர் ஆராய்ந்து வைத்திருப்பார்.
போட்டிக்கு தயாராகும் விதத்தில் தீவிரம் காட்டக்கூடியவர். உடற்தகுதிக்கும் அதிக முக்கியத்துவம் அளிக்கிறார். கேப்டனாக அவரது பயணம் மிகவும் வெற்றிகரமாக அமையும்.
ஸ்ரேயஸ் ஐயர், வீரர்களை வழிநடத்துவதில் மிகச் சிறந்தவர். வியூக ரீதியாக மிகவும் புத்திசாலித்தனமானவர்.
தனது அணியில் உள்ள ஒவ்வொரு வீரரின் பலத்தையும் நன்கு அறிந்திருக்கிறார். அவர்களிடமிருந்து சிறந்த ஆட்டத்தை எவ்வாறு வெளிக்கொண்டு வர வேண்டும் என்பதும் அவருக்குத் தெரியும்.
டி 20 கிரிக்கெட்டில் எதிரணியை விட ஒன்று அல்லது இரண்டு படிகள் முன்னேறி சிந்திக்க வேண்டும். எதிரணியின் பலம், பலவீனங்களை ஸ்ரேயஸ் ஐயர் மதிப்பிடும் விதமும், அதற்கேற்ப அவர் தயாராகும் முறையும் மிகவும் சிறப்பாக உள்ளது.
இதை பார்க்கும்போது மிகவும் மகிழ்ச்சியாக இருக்கிறது. இவ்வாறு லட்சுமண் கூறியுள்ளார்.
