இஸ்லாமாபாத்:
ஐசிசி டி20 உலகக் கோப்பை கிரிக்கெட் போட்டிக்கான 15 பேர் கொண்ட பாகிஸ்தான் அணி நேற்று அறிவிக்கப்பட்டுள்ளது.
ஐசிசி டி20 உலகக் கோப்பை கிரிக்கெட் போட்டி பிப்ரவரி 7-ம் தேதி முதல் மார்ச் 8-ம் தேதி வரை இந்தியா, இலங்கை ஆகிய நாடுகளில் நடைபெறவுள்ளது.
இந்நிலையில் பாதுகாப்புப் பிரச்சினை காரணமாக டி20 உலகக் கோப்பை போட்டியில் விளையாட இந்தியா செல்லமாட்டோம் என்று வங்கதேசம் அறிவித்தது.
இதனால் வங்கதேசத்தை நீக்கிவிட்டு ஸ்காட்லாந்து அணியை போட்டியில் சேர்த்து ஐசிசி (சர்வதேச கிரிக்கெட் கவுன்சில்) உத்தரவிட்டது.
இதற்கிடையே வங்கதேசத்துக்கு ஆதரவாக பாகிஸ்தான் டி20 உலகக் கோப்பை போட்டியில் இருந்து விலக போவதாக எச்சரிக்கை விடுத்து இருந்தது.
இந்நிலையில் வங்கதேசத்துக்கு ஆதரவாக உலகக் கோப்பையில் பங்கேற்பது குறித்து சந்தேகத்தை கிளப்பி அச்சுறுத்தல் விடுத்த பாகிஸ்தானுக்கு ஐசிசி கடும் எச்சரிக்கையை அனுப்பியிருந்தது.
இவ்வாறு செய்தால் கிரிக்கெட் உலகிலிருந்து பாகிஸ்தான் முழுமையாக தனிமைப்படுத்தப்படும் என்றும் ஐசிசி எச்சரிக்கை விடுத்தது.
இந்நிலையில், டி20 உலகக் கோப்பை தொடருக்கு சல்மான் அலி ஆகா தலைமையில் 15 பேர் கொண்ட அணியை பாகிஸ்தான் நேற்று அறிவித்துள்ளது.
பாகிஸ்தான் அணி அனைத்து போட்டிகளையும் இலங்கையில் விளையாடவுள்ளது குறிப்பிடத்தக்கது. ஒருவேளை நாக்-அவுட் சுற்றுக்கு பாகிஸ்தான் முன்னேறினால் அந்தப் போட்டிகளும் இலங்கையில்தான் நடைபெறும் என்று அறிவிக்கப்பட்டுள்ளது.
டி20 உலகக் கோப்பையில் பாகிஸ்தான் பிப்ரவரி 7-ம் தேதி நெதர்லாந்தையும், பிப்ரவரி 10-ம் தேதி அமெரிக்காவையும், பிப்ரவரி 15-ம் தேதி இந்தியாவையும் 18-ல் நமீபியாவையும் சந்திக்க உள்ளது.
ஐசிசி டி20 உலகக் கோப்பைக்கு முன்னதாக பாகிஸ்தான் அணி, 3 சர்வதேச டி20 போட்டிகள் கிரிக்கெட் தொடரில் ஆஸ்திரேலியாவை எதிர்த்து விளையாடவுள்ளது.
ஜனவரி 29-ம் தேதி லாகூர் கடாபி மைதானத்தில் முதல் போட்டியும், 31-ம் தேதி 2-வது போட்டியும், பிப்ரவரி 1-ம் தேதி 3-வது போட்டியும் நடைபெறவுள்ளது.
2026 டி20 உலகக் கோப்பைக்கான பாகிஸ்தான் அணி விவரம்: சல்மான் அலி ஆகா (கேப்டன்), அப்ரார் அகமது, பாபர் அஸம், பஹீம் அஷ்ரப், பகர் ஸமான், கவாஜா முகமது நபாய், முகமது நவாஸ், முகமது சல்மான் மிர்ஸா, நசீம் ஷா, சாஹிப்சதா பர்ஹான், சயீம் அயூப், ஷாஹீன் ஷா அப்ரிடி, ஷதாப் கான், உஸ்மான் கான், உஸ்மான் தாரிக்.
