சென்னை:
மத்திய – மாநில அதிகாரங்களை மறுபரிசீலனை செய்து, உண்மையான கூட்டாட்சியை வலுப்படுத்தும் எதிர்கால கட்டமைப்பை அரசியல் மற்றும் கட்சி வேறுபாடுகளுக்கு அப்பாற்பட்டு அனைவரும் இணைந்து உருவாக்க வேண்டும் என்று, மாநில முதல்வர்கள், பல்வேறு கட்சித் தலைவர்களுக்கு எழுதிய கடிதத்தில் முதல்வர் மு.க.ஸ்டாலின் வேண்டுகோள் விடுத்துள்ளார்.
இதுகுறித்து, அவர் நேற்று எழுதியுள்ள கடிதம்: கடந்த 1935-ம் ஆண்டு இந்திய அரசுச் சட்டத்திலிருந்து குறிப்பிடத்தக்க வகையில் வடிவமைக்கப்பட்ட இந்திய அரசமைப்பானது, மத்திய அரசுக்கும், மாநிலங்களுக்கும் இடையில் சிறந்ததொரு அதிகார சமநிலையுடன் கூடிய கூட்டாட்சி கட்டமைப்பினை உருவாக்கியது.
இருப்பினும், பல ஆண்டுகளாக இந்த சமநிலை தொடர்ந்து மாற்றப்பட்டு, வலுவான மத்திய அரசும், வலுவான மாநிலங்களும் முரண்பட்டிருக்காமல், ஒன்றையொன்று சார்ந்து, ஒவ்வொன்றும் மற்றவற்றின் வளர்ச்சிக்கு உறுதுணையாக இருக்க வேண்டும்.
கடந்த 1969-ம் ஆண்டு முதல்வராக கருணாநிதி இருந்தபோது, மத்திய- மாநில உறவுகள் குறித்து ஆராய்ந்து அறிக்கை அளிக்க நீதிபதி பி.வி.ராஜமன்னார் தலைமையில் முதல் குழுவை அமைத்தார்.
கடந்த 1971-ல் இந்தக் குழு அளித்த அறிக்கை, இந்தியாவில் கூட்டாட்சி குறித்த விவாதங்களை வடிவமைப்பதில் ஒரு மைல்கல்லாக அமைந்தது.
அதன்பின், மத்திய அரசு சர்க்காரியா கமிஷன் (1983 – 1988) மற்றும் புஞ்சி கமிஷன் (2007 – 2010) ஆகியவற்றை அமைத்தது.
இரண்டும் அதிகாரப் பகிர்வு குறித்து விரிவான முறையில் ஆராய்ந்தன என்றாலும், அவற்றின் பரிந்துரைகள் உண்மையான, சமநிலையான கூட்டாட்சிக் கட்டமைப்பை ஏற்படுத்துவதற்கு உதவவில்லை.
இதற்கிடையில், தொடர்ச்சியான அரசியலமைப்பு திருத்தங்கள், யூனியன் சட்டங்கள் மற்றும் மத்திய அரசின் கொள்கைகள், அதிகார சமநிலையை மத்திய அரசுக்குச் சாதகமாக சாய்த்துள்ளன.
இன்று, மத்திய-மாநில அதிகாரங்களில் உள்ள இந்த முன்னேற்றங்களை தீர்க்கமாக மறுபரிசீலனை செய்து, உண்மையான கூட்டாட்சியை வலுப்படுத்தும் எதிர்கால கட்டமைப்பை உருவாக்குவதே காலத்தின் தேவை.
இந்த நோக்கத்தின் அடிப்படையில், மத்திய-மாநில உறவுகள் குறித்து ஆராய்ந்து அறிக்கை அளிக்க, ஓய்வுபெற்ற உச்ச நீதிமன்ற நீதிபதி குரியன் ஜோசப்பை தலைவராகவும் ஓய்வுபெற்ற ஐஏஎஸ் அதிகாரி கே.அசோக் வரதன் ஷெட்டி, முன்னாள் திட்டக்குழுத் துணைத் தலைவர் மு.நாகநாதன் ஆகியோரை உறுப்பினர்களாகக் கொண்டும், உயர்நிலைக் குழு ஒன்றை தமிழக அரசு அமைத்துள்ளது.
இக்குழுவின் பணி செம்மையுற அமையும் வகையில், அனைத்து மாநிலங்கள் மற்றும் யூனியன் பிரதேசங்களின் பரிசீலிக்கப்பட்ட கருத்துக்களைப் பெற ஏதுவாக, ஒரு கேள்வித்தாளை இக்குழு தயாரித்துள்ளது. அதனை ‘https://hlcusr.tn.gov.in/’ என்ற இணைய தளத்தில் காணலாம்.
இந்த விஷயத்தில் மாநில முதல்வர்களும், பல்வேறு கட்சித் தலைவர்களும் கவனம் செலுத்தி, உயர்நிலைக் குழுவின் வினாத்தாளினை ஆராய்ந்து, விரிவான பதில்களை வழங்க வேண்டும்.
அனைத்து மாநிலங்களின் ஒட்டுமொத்த விருப்பத்தைப் பிரதிபலிக்கும் ஒரு ஆவணத்தை வடிவமைப்பதிலும், நமது நாட்டின் கூட்டாட்சி அடித்தளங்களை வலுப்படுத்துவதிலும் மாநில முதல்வர்கள் மற்றும் கட்சித் தலைவர்களின் தீவிர பங்கேற்பு மிக முக்கியமானதாக விளங்கும்.
இந்த முயற்சி அரசியல் மற்றும் கட்சி வேறுபாடுகளுக்கு அப்பாற்பட்டு நிற்பதாக, ஒன்றாக நமது அரசியலமைப்பின் கூட்டாட்சி உணர்வைப் புதுப்பித்து எதிர்கால சந்ததியினருக்கு வலுவான, ஒன்றுபட்ட மற்றும் உண்மையான கூட்டாட்சி கொண்ட ஒரு அரசை வழங்குவோம்.
