இந்தூர்:
இந்தியாவுக்கு எதிரான 3-வது மற்றும் கடைசி ஒரு நாள் கிரிக்கெட் போட்டியில் நியூஸிலாந்து அணி 41 ரன்கள் வித்தியாசத்தில் வெற்றி பெற்றது.
நியூஸிலாந்து வீரர்கள் டேரில் மிட்செல், கிளென் பிலிப்ஸ் ஆகியோர் சதம் விளாசி அணிக்கு வெற்றி தேடித் தந்தனர். மேலும் ஒருநாள் தொடரையும் நியூஸிலாந்து அணி 2-1 என்ற கணக்கில் கைப்பற்றியது.
நியூஸிலாந்து அணி இந்தியாவில் சுற்றுப்பயணம் செய்து 3 ஒருநாள் கிரிக்கெட் தொடர், 5 சர்வதேச டி20 கிரிக்கெட் தொடரில் விளையாடி வருகிறது.
வதோதராவில் நடைபெற்ற முதல் போட்டியில் இந்தியா 4 விக்கெட்கள் வித்தியாசத்திலும், ராஜ்கோட்டில் நடைபெற்ற 2-வது ஒருநாள் போட்டியில் நியூஸிலாந்து 7 விக்கெட்கள் வித்தியாசத்திலும் வெற்றி பெற்றது. இதையடுத்து ஒருநாள் தொடர் 1-1 என்ற கணக்கில் சமநிலையில் இருந்தது.
இந்நிலையில் இந்தூரில் உள்ள ஹோல்கர் மைதானத்தில் 3-வது ஒருநாள் போட்டி நடைபெற்றது. இந்திய அணியில் பிரசித் கிருஷ்ணாவுக்குப் பதிலாக அர்ஷ்தீப் சிங் சேர்க்கப்பட்டார்.
முதலில் விளையாடிய நியூஸிலாந்து அணி 50 ஓவர்களில் 8 விக்கெட் இழப்புக்கு 337 ரன்கள் குவித்தது. தொடக்க ஆட்டக்காரர்களாக டேவன் கான்வே, ஹென்றி நிக்கோல்ஸ் ஆகியோர் களமிறங்கினர்.
ஹென்றி நிக்கோல்ஸ் ரன் கணக்கைத் தொடங்காமலேயே அர்ஷ்தீப் சிங் பந்தில் ஆட்டமிழந்தார். மறுமுனையில் இருந்த டேவன் கான்வே, 5 ரன்கள் எடுத்திருந்த து, நிலையில் ஹர்ஷித் ராணா பந்துவீச்சில் ரோஹித் சர்மாவிடம் கேட்ச் கொடுத்து ஆட்டமிழந்தார்.
ஆனால் 3-வது விக்கெட்டுக்கு ஜோடி சேர்ந்த வில் யங்கும், டேரில் மிட்செல்லும் நிதானமாக விளையாடி ஸ்கோரை உயர்த்தினர். வில் யங் 41 பந்துகளில் 30 ரன்கள் சேர்த்திருந்த நிலையில் ஹர்ஷித் ராணா பந்தில், ஜடேஜாவிடம் கேட்ச் கொடுத்து ஆட்டமிழந்தார்.
4-வது விக்கெட்டுக்கு இணைந்த டேரில் மிட்செல்லும், கிளென் பிலிப்ஸும் அதிரடியாக விளையாடி ஸ்கோரை வெகுவாக உயர்த்தினர்.
இருவரும் அரை சதம் கடந்த நிலையில் அபாரமாக விளையாடி ரன்களைக் குவித்தனர். இந்திய அணியின் கேப்டன் ஷுப்மன் கில் பந்துவீச்சாளர்களை மாற்றிப் பார்த்தும் பலன் கிடைக்கவில்லை.
தொடர்ந்து அபாரமாக விளையாடிய டேரில் மிட்செல் இந்தத் தொடரில் தனது 2-வது சதத்தை விளாசினார்.
அவரைத் தொடர்ந்து கிளென் பிலிப்ஸும் சதம் விளாசினார். 88 பந்துகளில் 106 ரன்கள் (9 பவுண்டரி, 3 சிக்ஸர்) எடுத்த நிலையில், அர்ஷ்தீப் சிங் பந்துவீச்சில் கே.எல்.ராகுலிடம் கேட்ச் கொடுத்து பிலிப்ஸ் ஆட்டமிழந்தார்.
4-வது விக்கெட்டுக்கு பிலிப்ஸ்-மிட்செல் ஜோடி 219 ரன்கள் சேர்த்தது குறிப்பிடத்தக்கது.இதன் பின்னர் வந்த மிட்செல் ஹே 2, ஜகாரி பவுல்க்ஸ் 10, கிறிஸ்டியன் கிளார்க் 11 ரன்கள் சேர்த்தனர்.
அதிரடியாக விளையாடிய டேரில் மிட்செல் 131 பந்துகளில் 137 ரன்கள் (15 பவுண்டரி, 3 சிக்ஸர்) குவித்து 45-வது ஓவரில் ஆட்டமிழந்தார்.கேப்டன் மைக்கேல் பிரேஸ்வெல் 28, கைல் ஜேமிசன் 0 ரன்களுடன் ஆட்டமிழக்காமல் இருந்தனர்.
இந்திய அணி தரப்பில் அர்ஷ்தீப் சிங், ஹர்ஷித் ராணா ஆகியோர் தலா 3 விக்கெட்களைக் கைப்பற்றினர். முகமது சிராஜ், குல்தீப் யாதவ் ஆகியோர் தலா ஒரு விக்கெட்டைச் சாய்த்தனர்.
பின்னர் 338 ரன்கள் எடுத்தால் வெற்றி என்ற இலக்குடன் இந்திய அணி விளையாடத் தொடங்கியது. தொடக்க ஆட்டக்காரர்களாக ரோஹித் சர்மாவும், கேப்டன் ஷுப்மன் கில்லும் களம்புகுந்தனர்.
அதிரடியாக விளையாட முயன்ற ரோஹித் சர்மா 11 ரன்கள் எடுத்திருந்தபோது ஜகாரி பவுல்க்ஸ் பந்துவீச்சில் கிறிஸ்டியன் கிளார்க்கிடம் கேட்ச் கொடுத்து ஆட்டமிழந்தார்.
கேப்டன் ஷுப்மன் கில் 18 பந்துகளில் 23 ரன்கள் (4 பவுண்டரிகள்) எடுத்திருந்போது, கைல் ஜேமிஸன் வீசிய பந்தில் போல்டானார்.
இதைத் தொடர்ந்து விளையாட வந்த ஸ்ரேயஸ் ஐயர் 3 ரன்களும், கே.எல்.ராகுல் ஒரு ரன்னும் எடுத்து பெவிலியன் வந்தனர். 5-வது விக்கெட்டுக்கு விராட் கோலியுடன் ஜோடி சேர்ந்த நிதிஷ்குமார் ரெட்டி 53 ரன்கள் எடுத்து அவுட்டானார்.
ரவீந்திர ஜடேஜா 12 ரன்களில் வீழ்ந்தார். 7-வது விக்கெட்டுக்கு கோலியுடன் இணைந்த ஹர்ஷித் ராணா அதிரடியாக விளையாடி 41 பந்துகளில் 52 ரன்கள் சேர்த்து அவுட்டானார். இதனிடையே விராட் கோலி ஒருநாள் போட்டிகளில் தனது 54- வது சதத்தை விளாசினார்.
ஹர்ஷித் ராணா-விராட் கோலி ஜோடி களத்தில் இருந்தபோது இந்திய அணி வெற்றி பெறும் என்ற நம்பிக்கை இருந்தது.
ராணா ஆட்டமிழந்ததும், கோலியும் வீழ்ந்தார். அவர் 108 பந்துகளில் 124 ரன்கள் சேர்த்தார். கோலி வீழ்ந்ததும் இந்திய அணியின் தோல்வி உறுதியானது.
முகமது சிராஜ் 0, குல்தீப் யாதவ் 5 ரன்கள் எடுத்தனர். அர்ஷ்தீப்சிங் 4 ரன்களுடன் ஆட்டமிழக்காமல் இருந்தார். 46 ஓவர்களில் 296 ரன்களில் இந்திய அணியின் இன்னிங்ஸ் முடிவுக்கு வந்தது.
இதையடுத்து நியூஸிலாந்து 41 ரன்கள் வித்தியாசத்தில் வெற்றி பெற்று ஒருநாள் தொடரையும் 2-1 என்ற கணக்கில் கைப்பற்றியது.நியூஸிலாந்து அணித்தரப்பில் ஜகாரி பவுல்க்ஸ், கிறிஸ்டியன் கிளார்க் ஆகியோர் தலா 3, ஜெய்டன் லென்னாக்ஸ் 2, கைல் ஜேமிசன் ஒரு விக்கெட்டை வீழ்த்தினர்.
