சென்னை:
‘டூரிஸ்ட் பேமிலி’ படத்தை இயக்கிய அபிஷன் ஜீவிந்த், ஹீரோவாக நடித்த படம் ‘வித் லவ்’. அனஸ்வரா ராஜன், காவ்யா, சரவணன், சச்சின் நடித்துள்ள இப்படத்துக்கு ஷான் ரோல்டன் இசையமைத்துள்ளார். ஷ்ரேயாஸ் கிருஷ்ணா ஒளிப்பதிவு செய்துள்ளார்.
அறிமுக இயக்குநர் மதன் இயக்கிய இப்படத்தை ஸயான் பிலிம்ஸ் சார்பில் சவுந்தர்யா ரஜினிகாந்த், எம்ஆர்பி என்டர்டெயின்மென்ட் சார்பில் பசிலியான் நாசரேத், மகேஷ் ராஜ் பசிலியான் தயாரித்துள்ளனர்.
பிப்.6-ல் வெளியான இப்படம் வரவேற்பைப் பெற்றதை அடுத்து, வெற்றி விழா சென்னையில் நடைபெற்றது.
விழாவில் சவுந்தர்யா ரஜினிகாந்த் பேசும்போது, “இப்படத்தின் ப்ரீமியர் ஷோ முடிந்து வீட்டுக்குச் சென்றபோது அப்பா–அம்மா இருவரும் என்னை கட்டிப்பிடித்துச் சிரித்தார்கள்.
அப்போது ‘இதுதான் சக்சஸ்’ என்று உணர்ந்தேன். அந்த அப்பாவின் சிரிப்பை வாழ்க்கை முழுவதும் மறக்க மாட்டேன்.
16–18 ஆண்டுகளாக சினிமா பயணத்தில் இருந்தாலும், இந்த படத்தின் மூலமாகத்தான் வெற்றி என்பதன் உண்மையான அர்த்தம் புரிந்தது. இது தான் முதல் சக்சஸ் மீட்.
இயக்குநர் மதன் கதை சொன்ன போதே இது வெற்றி படம் என்ற நம்பிக்கை வந்தது. இரண்டாம் பாதியில் வரும் காட்சிகளும், இறுதியில் நான்கு கதாபாத்திரங்களும் ஒரே ஷாட்டில் சந்திக்கும் காட்சியும் முழுமையான டைரக்டர் டச்.
அவரது அடுத்த படத்துக்கு நாங்கள் தயாராக இருக்கிறோம். இந்த படம் வெறும் ‘நல்ல படம்’ என்ற ஸ்டேட்டஸை தாண்டி, மக்கள் தங்கள் படமாகக் கொண்டாடுவது எங்களுக்கு கிடைத்த மிகப்பெரிய வெற்றி” என்றார். படக்குழுவினர் கலந்துகொண்டனர்.
