கும்பகோணம்:
கும்பகோணம் அருகே கருப்பூரில் புதிய பேருந்து நிலையம் அமைக்க அதிமுக – மதிமுக எதிர்ப்பு தெரிவித்து நகராட்சிக் கூட்டத்தில் இருந்து வெளிநடப்பு செய்தது. இதனிடையே, 10.58 ஏக்கர் நிலத்தை தானமாக வழங்கிய எம்எல்ஏவுக்கு திமுக,காங்கிரஸ்,கம்யூனிஸ்ட் கட்சிகள் வாழ்த்து கூறி ஆதரவு தெரிவித்தனர்.
கும்பகோணம் பழைய நகராட்சி அலுவலகத்தில் மாமன்ற உறுப்பினர்கள் கூட்டம் நடைபெற்றது. மேயர் க.சரவணன் தலைமை வகித்தார். துணைமேயர சு.ப.தமிழழகன், ஆணையர் காந்திராஜ் ஆகியோர் முன்னிலை வகித்தனர். கூட்டத்தில் உறுப்பினர்கள் கூறியது:
கருப்பூரில் புதிய பேருந்து நிலையம் அமைப்பதற்கு 10.58 ஏக்கர் நிலத்தை தானமாக வழங்கிய கும்பகோணம் எம்எல்ஏவுக்கு வாழ்த்து கூறி ஆதரவு தெரிவிக்கப்பட்டன. கும்பகோணம் மாநகராட்சி அதிகாரிகள், தாராசுரம் பகுதிகளில் எந்தவிதமான பணிகளும் மேற்கொள்வதில்லை.
மேலும் மாநகராட்சி இடத்தை, அதிகாரிகள் துணையோடு பதிவு செய்வதாக கூறப்படுகிறது.
அதை தடுக்க வேண்டும். 3 ஆண்டுகளுக்கு மேல் பணியாற்றும் அதிகாரிகளை உடனே இடமாற்றம் செய்ய வேண்டும். மின்விளக்குகள் சரிவர ஒளிர்வதில்லை. குடிநீரில் புழுக்கள் வருகிறது. இதனால் தாராசுரம் பகுதி மக்கள் அவதிக்குள்ளாகி வருகின்றனர்.
தாராசுரத்தில் உள்ள மேல்நிலை நீர்த்தேக்கத்தொட்டிக்கு கீழ் சுமார் 3 அடிக்கு மேல் மழை நீர் பல நாட்களாக தேங்கி உள்ளது.
அதில் கொசுக்கள், புழுக்கள் உற்பத்தி துர்நாற்றம் வீசுகின்றது. அதனை சீர் செய்து மழை நீர் தேங்காவாறு நடவடிக்கை மேற்கொள்ள வேண்டும்.
எம்ஜிஆர் நகரில் அண்மைக்காலமாக புதை சாக்கடையில் இருந்து கழிவு நீர் வெளியேறுகிறது.
அதிகாரிகள் சீர் செய்தாலும் முறையாக பணிகள் மேற்கொள்ளாததால், மறுநாளே கழிவு நீர் வெளியேறுகிறது.
இதற்கு புதை சாக்கடை பணிகளை மேற்கொள்ளும் ஒப்பந்தக்காரரே பொறுப்பாகும். அதனால் அவரை ஒப்பநத்ததை ரத்து செய்து நடவடிக்கை எடுக்க வேண்டும். 2025,ஜூன் 12-ம் தேதி முதல்வர் மு.க.ஸ்டாலினால் திறந்து வைக்கப்பட்ட மண்டல அலுவலகத்தில் மீதம் உள்ள கட்டுமானப்பணிகள் மேற்கொள்ள வில்லை.
கடந்த கூட்டத்தில் அறிவுறுத்தியும் கட்டுமான மேற்கொள்ளும் ஒப்பந்தக்காரர் அலட்சியமாக உள்ளார். இதனால் மண்டல கூட்டங்கள் நடத்த முடியவில்லை. அந்த அலுவலகம் கட்டியதற்கான குறிக்கோள் நிறைவேறாமல் உள்ளது.
எனவே, ஒப்பந்தக்காரரிடம் அறிவுறுத்தி அடுத்த கூட்டத்திற்குள் மீகம் உள்ள பணிகள் மேற்கொள்ள உத்தரவிட வேண்டும்.
ஆதிகும் பேஸ்வரர் கோயில் கும்பாபிஷேகம் நடைபெறுவதையொட்டி பக்தர்களுக்கு தேவையான போதிய அடிப்படை வசதிகளை உடனடியாக செய்து தரவேண்டும் என்றனர்.
முன்னதாக, மதிமுக உறுப்பினர் பிரதிமா: கருப்பூரில் புதிய பேருந்து நிலையம் அமைத்தால், தற்போது உள்ள பேருந்து நிலையத்தில் உள்ள வணிகர்கள் பாதிக்கப்படுவார்கள்.
மேலும் பள்ளி, கல்லூரி, பணி நிமித்தமாக செல்பவர்கள் உள்ளிட்ட அனைவரும் பெரிதும் சிரமத்துக்குள்ளாவார்கள். இதனால் 15 ஆண்டுக்கு பின்னோக்கி சென்று விடுவோம்.
கும்பகோணத்தை மாவட்டமாக அறிவித்தப்பின், அனைத்து அலுவலகம் அமைய உள்ள பகுதியில் பேருந்து நிலையம் அமைக்க வேண்டும் என்றார்.
அதிமுக உறுப்பினர்கள்: 2025,செப்.22-ம் தேதி நடைபெற்ற கூட்டம் ஒத்தி வைக்கப்பட்டது. ஆனால் கருப்பூரில் பேருந்து நிலையம் அமைய தீர்மானம் எப்போது நிறைவேற்றப்பட்டது என்றனர்.
திமுக தட்சிணாமூர்த்தி: அப்போது நடைபெற்ற கூட்டத்தில் புதிய பேருந்து நிலையம் அமைப்பதற்கான தீர்மானம் நிறைவேற்றப்பட்டதற்கான மினிட் நோட்டில் பதிவு உள்ளது என்றார்.
துணை மேயர் சு.ப.தமிழழகன்: தற்போது உள்ள பேருந்து நிலையத்தில் போக்குவரத்து நெருக்கடி ஏற்படுவதால், பல்வேறு சமூக ஆர்வலர்கள் கேட்டுக்கொண்டதற்கிணங்க, கும்பகோணம் எம்எல்ஏ சாக்கோட்டை க.அன்பழகன், சுமார் 10.58 ஏக்கர் தனது சொந்த நிலத்தை தானமாக வழங்க உள்ளார்.
அதனால் அனைத்து உறுப்பினர்களும் ஒத்துழைக்க வேண்டும். இது தொடர்பாக அதிகாரிகள் மட்டத்தில் கலந்தாய்வு கூட்டம் நடத்தப்பட்டு அதன்படி திட்ட அறிக்கை தயாரிக்கப்பட்டுள்ளது.
மேலும், விரைவில் புதியதாக அமைய உள்ள பேருந்து நிலையத்தின் அருகிலேயே டைடல் பார்க் வர உள்ளது. அதற்கான முயற்சிகள் மேற்கொள்ளப்பட்டு வருகின்றன.
அங்கு புதிய பேருந்து நிலையம் அமைந்து இயக்கினாலும், கும்பகோணத்தில் தற்போது உள்ள பேருந்து நிலையங்களுக்கு அனைத்து பேருந்துகளும் வந்து செல்லும். இதனால் பயணிகள், பள்ளி, கல்லூரி உள்ளிட்டோருக்கு அசவுகரியம் ஏற்படாது.
மண்டல அலுவலகங்களில் மீதம் உள்ள பணிகளை மேற்கொள்ளாமல் அலட்சியமாக செயல்படும் ஒப்பந்த்க்காரரின் ஒப்பந்தத்தை ரத்து செய்து, அவரை பெயரை பிளாக் லிஸ்டில் பதிவேற்றம் செய்யப்படும் என்றார்.
ஆணையர் காந்திராஜ்: புதிய பேருநது நிலையம் அமைப்பது தொடர்பாக வணிகர் உள்ளிட்ட அனைவரிடமும் கலந்தாய்வு கூட்டம் நிரைவில் நடத்த முடிவு செய்யப்பட்டுள்ளது என்றார் அவர்.
